कालिकोट । बालअधिकारको अभियानलाई जिल्लाव्यापी बनाउन नागरिक समाजका पदाधिकारीहरुले प्रतिबद्धता जनाएका छन् ।
बालअधिकारको अभियानलाई जिल्लाव्यापी बनाएर पैरवी गर्नका लागि नागरिक समाजको विस्तृत कार्ययोजना निर्माण गरी सोहीअनुसार कार्यान्वयन गरिने पत्रकार महासंघ कालिकोटका अध्यक्ष भरतराज विष्टले बताए ।
बालअधिकार प्रबर्द्धनको अभियानमा नागरिक समाजको महत्वपूर्ण भूमिका रहने एक कार्यक्रममा सहभागिले बताएका छन् । बालअधिकार प्रबर्द्धन अभियानका लागि नागरिक समाजका पदाधिकारीहरुलाई क्षमता अभिवृद्धि तथा कार्यशाला गोष्ठिको आयोजना गरिएको छ ।
क्षमता अभिवृद्धि तथा कार्याशाला गोष्ठिका सहभागिहरुले बाल अधिकार प्रबर्द्धनको अभियानमा सञ्चार जगत तथा नागरिक समाजको महत्वपूर्ण भूमिका रहने बताएका छन् । एकदिने क्षमता अभिवृद्धि तथा कार्यशाला गोष्ठिमा बालअधिकारको प्रबर्द्धनका लागि बनेका राष्ट्रिय तथा अन्तराष्ट्रिय कानूनी प्रावधानका बारेमा सहभागिलाई जानकारी गराउने सेभ द चिल्ड्रेनका परियोजना संयोजक बाले विश्वकर्माले बताए ।
विश्वकर्माले कार्यक्रमका उदेश्यमाथि प्रष्ट पार्दै बालअधिकार संरक्षण अभियानलाई जिल्लाव्यापी बनाउनका लागि नागरिक समाजको भूमिकाका विषयमा छलफल गर्ने, बालअधिकारको अभियानलाई जिल्लाव्यापी र दिगोपना बनाउनका लागि नागरिक समाजको कार्ययोजना निर्माण गर्ने उदेश्य रहेको बताए ।
किर्डाक नेपालका परियोजना संयोजक प्रकाशबहादुर शाहीले सेभ द चिल्ड्रेन र किर्डाक नेपालले बालअधिकारको संरक्षण र प्रबर्द्धनका क्षेत्रमा कालिकोट जिल्लामा स्थापित र उदाहरणीय अभियान थालेको बताए । साथै, शाहीले बालबालिकामा लगानी गर्नुपर्ने, स्थानीय तहको योजना प्रकियामा बालबालिकाको क्षेत्रमा पनि लगानी गर्न लगाउनुमा नागरिक समाजको महत्वपूर्ण भूमिका रहने बताए ।
किर्डाक नेपालका परियोजना संयोजक सरिता खत्रीले बालविवाह निषेधित वडा तथा पालिका घोषणा एवं हिंसा रहित वडा तथा पालिका घोषणा गर्नतिर पनि नागरिक समाज लाग्नुपर्नेमा जोड दिइन् । खत्रीले बालबालिकाको क्षेत्रमा बजेट बिनियोजन तथा प्रभावकारी कार्यान्वयनका विषयमा जानकारी दिँदै सबै लाग्नुपर्ने बताइन् ।
जोखिममा रहेका बालबालिकाको तथ्यांक संकलन तथा अध्यावधिक, निरन्तर सहयोगका लागि पैरबी गर्नुपर्ने उनले बताइन् । सहयात्रा परियोजना (दोस्रो) कार्यक्रम संयोजक कृपराज जोशीले अनिवार्य निःशुल्क शिक्षा अभियान, सुरक्षीत बिद्यालय अभियानका बिषयमा स्पष्ट पार्दै प्रस्तुतिकरण तथा छलफल गराएका छन् ।
हिंसा दुर्व्यवहारमा परेका बालबालिकाहरुको न्यायिक सहयोगका लागि अनुगमन तथा वकालतमा विशेष जोड दिनुपर्ने जोशीले बताए । सहयात्रा परियोजना (दोस्रो) कार्यक्रम संयोजक कृपराज जोशीको अध्यक्षता तथा शुभकालिका गाउँपालिका अध्यक्ष गोविन्दप्रसाद आचार्यको प्रमुख आतिथ्यतामा कार्यक्रम भएको थियो ।
कार्यक्रममा तिलागुफा नगरपालिका र शुभकालिका गाउँपालिकाका बाल सन्ज्याल, नागरिक समाजका पदाधिकारी, जिल्लास्तरीय नागरिक समाज, मानवअधिकार कर्मीलगायतको सहभागिता रहेको थियो ।
साझा रैबार । १ जेष्ठ २०८०, सोमबार १६:१६